كتب : عمار مطاوع 

فاكرين الخبر اللي كان انتشر ع الفيس من سنة بخصوص القبض علي رجل وزوجته بتهمة توزيع وجبات غذائية علي طلبة الأزهر؟
ْ
فاكرين لما قعدنا نتريق علي الخبر ده ونقول شوفتوا الهبل والظلم والعبط؟
ْ
أهو الراجل ده وزوجته اتحسبوا بالفعل .. واتحكم عليهم بـ 3 سنين سجن .. ثم كانت جلسة النطق بالحكم في الاسئناف بتاعهم .. وصدر قرار نهائي بحبسهم سنة مع النفاذ .. والتهمة اللي مكتوبة في المحضر: توزيع وجبات غذائية علي طلاب الأزهر..
ْ
لكن اللي متعرفهوش بقي:
ْ
أولا: الدكتور سماح سمير مش أي دكتورة .. دي مديرة مستشفي في منشية البكري..
ْ
ثانيا: الدكتور سماح سمير مترحلة سجن الإبعادية في دمنهور بعد مجزرة القناطر مخصوص عشان يكون ليها في السيرة بتاعها مشاكل مع السجن عشان ما تطلعش في تلت المدة بحسن سير وسلوك..
ْ
ثالثا: وقت الاعتداء علي دكتورة سماح في سجن القناطر وحبسها انفرادي .. زوجها كان بيتحايل علي طوب الأرض عشان يعرف أي معلومة بس يتطمن عليها .. تخيل شعور زوج محبوس وهوا بيسمع طراطيش كلام إن زوجته محبوسة انفرادي وتم الاعتداء عليها..
ْ
رابعا: مرة في سجن القناطر قابلت واحد قريبها رايح يزورها .. فسألته: إنت بتشتغل إيه؟ .. لقيته وطي صوته وقالي بخوف كده: صاحب مزرعة دواجن .. سألته: طب إنت بتوطي صوتك ليه؟ .. قالي: إذا كان سماح ممسوكة بتهمة توزيع وجبات فراخ وأخدت 3 سنين سجن .. أومال لو عرفوا إني عندي مزرعة دواجن هيعملوا فيا إيه!؟
ْ
خامسا: الدكتور سماح وزوجها أول زوجين مصريين يقضيان عقوبة كاملة بالسجن منذ الانقلاب..