الناشط السياسي د. ياسر نجم عبر حسابه الشخصي بموقع فيسبوك :

البصه والرافال والقفا:

امبارح الهند خلصت مع فرنسا في صفقة طيارات الرافال..
36 طيارة مقابل 7.8 مليار يورو...
وهو نفس السعر تقريبا اللى مصر خدت بيه ال24 طيارة بتوعها مقابل 5.2 يورو..
تقف الطيارة الواحدة بحوالى 220 مليون يورو...

لكن:
1- الاحتياطى النقدى عند الهند = 367 مليار دولار (سابع اقتصاد فى العالم)...بينما مصر 17 مليار دولار..(اقتصاد شبه دولة على ما تفرج)...
2- الهند خدت الرافال لسبب واحد محدد..انها تقدر تشيل رءوس نووية..وبالتالى هاتصنع الفارق فى التوازن العسكرى مع جارتها اللدودة باكستان..(والصين أيضا)..
أما فى حالة مصر فتم نزع الأجزاء ذات القدرات النووية من طائرات الرافال قبل تسليمها لمصر...
وبالتالى بقت طيارة عادية..أقل من الاف 16 وأغلى منها بكتيييييييير..ومصر مش محتاجاها أساسا..
ومعروف انها اشترتها لشراء شرعية أوروبية للسيسي...
ده القفا الأولانى..
3- احسب بقى حجم خسارتنا اذا كانت الهند اشترتها بقدرات نووية مقابل 220 مليون يورو..واحنا اشتريناها من غير قدرات نووية بنفس السعر..
القفا التاني..

اللى فات بقى كوم والجاى كوم تانى..

4- بما ان مصر مامعهاش..وماطبقتش المثل الشعبي اللى مامعوش مايلزموش...
اضطرينا نستلف تمن الطيارات من البنوك الفرنسية..
وهانسدد التمن الأصلى + فوايد القروض..من ال17 مليار دولار اللى حيلتنا..
يعنى مش بس اتضحك علينا فى شيل القدرات النووية..وفى السعر..لأ كمان فرنسا قرطستنا..بأنها نفعت بنوكها بقرض..وهاتاخد تمن الطيارات وفوقه فوايد القرض..من الإحتياطى اللى يعتبر فى الأرض بمقاييس الدول..
قفا تالت..بس ده دوبل لو سمحت...
5- الهند بقى..اللى هى فى عرض الطيارات..ومحتاجاها بشدة..وكمان معاها 367 مليار دولار عملت ايه..
مش بس دفعت كاش تمن الطيارات..ومافرقش معاها نظرا لثرائها..
لأ..دى أجبرت فرنسا انها تستثمر نص تمن الصفقة (4 مليار يورو) فى داخل الهند..وفى المصانع الهندية..
يعنى ال4 مليار يورو..مش هايخرجوا بره الهند..وهاينعشوا الصناعة الهندية..وهايجيبوا أرباح تفوق تمن الطيارات أضعاف مضاعفة..
وال367 مليار هايزيدوا ويربربوا كمان وكمان...
وده يفهمنا ببساطة ليه هم وصلوا 367 أساسا وليه عندنا اتدحدروا ل17 وفى النازل..
قفا تريبل من فضلك..

ممكن كل ده يفسر لك ليه رئيس وزراء الهند (المدنى المنتخب ديموقراطيا ولم يصل للحكم بانقلاب عسكري) بص للسيسي البصة دى فى قمة العشرين بتاعة الإقتصادات العملاقة فى العالم...رغم ان السيسي كان لسه مقابله فى الهند قبلها بأيام..
سمعنى أحلى طرقعه...

المصادر: اضغط على العنوان للوصول إلى المصدر

- سبب شراء الهند للرافال

- نزع القدرات النووية من الطائرات المباعة لمصر

- الصفقة الهندية الفرنسية

- احتياطى الهند من الدولار

- القرض المصرى للصفقة من البنوك الفرنسية

- مقارنة بين الاف 16 والرافال goo.gl/lfHXXT