تدوال نشطاء مواقع التواصل منشورا لأحد الأطباء ينتقد فيه شراء رئاسة الانقلاب 4 طائرات خاصة فاخرة أشبه بالفنادق، بتكلفة وصلت لـ300 مليون يورو (3 مليارات جنيه) .

المنشور كان بعنوان "يا تري لو فخامة الرئيس المحب للطائرات قرر يشتري 3 طيارات بس بدلا من 4 و وفر علي البلد 90 مليون يورو، يعني تقريبا مليار جنيه، كان ممكن نستغلهم في ايه ؟" .. والذي قال ناشره فيه :

طيب يا تري لو فخامة الرئيس المحب للطائرات قرر يشتري 3 طيارات بس بدلا من 4 و وفر علي البلد 90 مليون يورو، يعني تقريبا مليار جنيه، كان ممكن نستغلهم في ايه ؟

- كان ممكن نشتري 50 جهاز أشعة مقطعية سعر الواحد حوالي 2 مليون جنيه ، يبقي كده 100 مليون
- و نشتري 200 جهاز سونار و دوبلر سعر الواحد ربع مليون جنيه، يبقي كده كمان 50 مليون
- و نشتري 300 حضانة أطفال، هنقول سعر الواحدة 350 الف، يبقي كده كمان 100 مليون

كده ربع مليار جنيه

- نشتري 10 الاف كرسي متحرك سعر الواحد 600 جنيه - اه و الله 600 جنيه بس و المريض مش بيلاقيه - يبقي كده 6 مليون جنيه
- و نشتري 1000 جهاز رسم قلب نضيف سعر الواحد 10 الاف جنيه، بإجمالي 10 مليون جنيه
- و نشتري 100 الف قسطرة وريدية مركزية، سعر الواحدة 180 جنيه، يبقي كده 18 مليون جنيه

دول كلهم على بعض ما يكملوش كمان 50 مليون، يبقي كده المجموع 300 مليون

-ناخد كمان 100 مليون نجيب بيهم سرنجات و جوانتيات و خيوط و فوط بطن و خلافه، يبقي كده 400 مليون

-نجهز غرف عناية مركزة بربع مليار كمان، و وحدات غسيل كلوي ب 200 مليون، يبقي كده إجمالي 850 مليون

يتبقي عندنا 150 مليون، نوزعهم مكافأة علي السادة القضاة لأن بقالهم كتير ما اخدوش مكافآت، يبقي نصيب كل قاضي 10 الاف جنيه

كل ده بتمن طيارة واحدة من الأربع طيارات بتوع فخامة الرئيس

بس طبعا انا مدرك ان الطيارة اهم، و ان من غير الطيارة دي ممكن هيبتنا وسط الرؤساء تروح.