كتبها : مصطفي خليل - عبر فيسبوك

فيه النهارده تلات أخبار اقتصادية مهمة.. أولا بيانات إيرادات قناة السويس المحتجبة ظهرت أخيرا وتشير لانخفاض ٩٪ في شهر أغسطس مقارنة بالعام الماضي وده دليل رسمي قاطع على ان السيسي كان بيكدب لما قال قبل كده ان كان فيه زيادة في الحركة! ودليل أكبر على أن المشروع العملاق المكلف جدا ده مش هيجيب أي أرباح في المستقبل المنظور ومش هيقدر حتى يسد فوايد الدين اللي ااتعمل بيه!

ثانيا فيه أخبار عن ضريبتين جداد يضافوا على ما تم فرضه الأسبوع اللي فات.. ضريبة على مصاريف التعليم والعلاج الخاص، وضريبة على ١٥٠ سلعة مستوردة مما تعتبره الحكومة كماليات زي المكسرات والحلويات وبعض الأجهزة المنزلية! وده يدل ان الحكومة بتستموت في لم الفلوس بأي شكل!!

وأخيرا فيه خبر عن وصول مستوى الدين الخارجي في مصر لأعلى مستوياته من ٢٤ سنة.. يعني من ساعة ما نادي باريس شال نص ديون مصر بعد حرب الخليج التانية.. يعني احنا رجعنا كده رسمي لمستويات أزمة الديون بتاعة التمانينات!

البلد فعلا بتغرق، وواضح ان احنا قربنا جدا من الانهيار الكامل.. بقينا أقرب إليه من أي وقت قبل كده.. واضح كمان ان اللي بيحكم معندوش حل غير لم الفلوس من الناس بالضرايب، وده طبعا مش حل، فالمتوقع دلوقتي ان سيادة الرئيس المنقذ اللي مكانلوش برنامج واعتمد على ثقة الناس في الجيش عشان يحكم انه يتحمل مسؤولياته ويطلع يتكلم معانا كده ويفهمنا هو ناوي يعمل ايه في المصيبة دي اللي هو سبب مباشر فيها.. لأن احنا كده خلاص.. السواق نط من العربية، والفرامل سايبة والحيط بقى قدامنا علطول!