معاناة المهندس احمد حافظ ومن معه من المعتقلين يرويها من داخل سجن العقرب بعد أكثر من 300 يوم اعتقال.

نقلتها زوجته، ونشرت في صفحة "كلنا المهندس أحمد حافظ" بموقع فيس بوك :

طلبت من أحمد يقول كلمة لـ انقلها لكم
من وحى المحنة وتجربة الأسر
اللى عايشها الآن فى سجن العقرب-شديد الحراسة
بدون محاكمة ولا عرض على النيابة !!
ومن قبل 87 يوم قضاهم فى سجن العازولى العسكرى !!
تعرض فيه لما لا يتخيله بشر !!!!
فاللهم اربط على قلبه وقلوبنا وهون عليه ما يلاقيه فى سبيلك يااااااارب

مجمل كلامه كان كالتالى
هأقول بعض منه ونكمل بعدين

أثر فيا أن فى نعم كتيييير مكنش الواحد حاسس بيها
الواحد فعلااا مبيعرفش قيمة النعمة الا لما بيفقدها

نظرتنا للنعم لازم تتغير
الإلفة والإعتياد اللى بيصيبوا القلب
بيخلوا الواحد مش مستشعر بالنعمة وإحساسها
أنه قد يُحرم منها فى أى وقت !!

تخيلى نعمة أن الواحد يشوف الشمس والسماء ويحس بنسمة الهواء تخبط فى وشه كده
أحنا هنا بنتعرض للشمس 3 ساعات فقط فى الأسبوع !!
نعمة دخول الحمام دون قيد أو وقت !!
نعمة الأمان أن الواحد قاعد مطمن مش هيدخل عليه واحد يضربه ولا يأخد حاجاته منه فى أى وقت فجأة !!
نعمة الوسع وأن المكان يكون براح قدامك !!
نعمة المية اللى كتيير بيقطعوها علينا !!
نعمة الألوان.. أحنا عندنا الأوض إما لونها فرانى أو أسود !!
نعمة الأكل.. أنك مش شايل هم أكل الزيارة يخلص أو يبوظ وتأكل أكلهم اللى هو أى كلام !!
نعمة الدفء أنك متدفى بالبطاطين فى الجو الساقع ده وبتستحم بمية دافية مش ساقعة !!
نعمة أنك عندك غسالة مش بتغسل ملابسك على أيديك !!
نعمة أنك نايم على سريرك ومرتاح مش على الأرض بمكان به حشرات عمال تموت فيها !!
نعمة أنك تشوف بنى آدمين جديدة وأماكن جديدة !!
نعمة الخصوصية أنك نفسك تقعد لوحدك !!
لكن هنا حتى الحمام جوة الزنزانة وبدون باب يستر !!
فـ حاطين شوية أكياس كده علشان ممنوع الستارة حتى !!
نعمة الكتب أنك تقرأ أى كتاب أنت محتاجه فى أى وقت !!
هنا ممنوع دخول أى كتب !!
فالاحساس بضياع وقت كبير جدا كان ممكن يستثمر فى القراءة
إحساس وحش وصعب جداااا
نعمة الزوجة والأهل وأنى اتحرمت منك ومن رُقية وتربيتها كما نحب !!
فاصبرى واحتسبى وربنا يعوضنا عن كل ده يـــــارب

من كان فى نعمة فليرعاها
" ثُمَّ لَتُسْأَلُنَّ يَوْمَئِذٍ عَنِ النَّعِيمِ "

311 يوم !!
حسبنا الله